CEBU, Philippines - Gibasura sa korte ang giduso nga motion ni kanhi mayor Lakambini Reluya sa San Fernando nga nagtumbok nga dili gamiton ang mga Precinct Count Optical Scan kon PCOS machine sa pagpahigayon sa recounting sa mga balota sa lungsod sa San Fernando niadtong election sa Mayo 10.
Si RTC-7 Judge Ramon Daomilas Jr. sa branch 11 nagkanayon sa kamanduan nga si Reluya wala makahatag og gibug-aton sa isyu kun unsaon pagsuta sa authenticity sa usa ka balota nga gigamit sa labing unang automated election.
Nasayran nga si Reluya mitumbok sa iyang motion nga dili na kinahanglan pang gamiton ang PCOS machine sa pagpahigayon sa korte sa recounting sa mga balota sanglit magkinahanglan kini og dugang panahon ug kwarta sa pagkuha og balik sa maong mga PCOS machine.
Matud pa ni Judge Daomilas nga iyang gihatagan og gibug-aton ang Rule 10 Section 6 (e) sa The 2010 Rules of Procedure for Municipal Election Contests nga nagmando nga ang pag-authenticate sa mga balota kun matuod ba kini o dili, mao ang paggamit sa PCOS machine na mismo. Gipasabot sa huwes nga dili makahimo ang korte sa pag-ihap sa mga botos sa lungsod kun dili ma-authenticated sa PCOS machine ang maong mga balota.
Tungod niini gibasura sa korte ang motion ni Reluya ug gipadayon niini ang pagmando nga ibalik dinhi sa Sugbu ang PCOS machine nga gigamit niadtong nakalabay nga election aron masugdan ang pag-ihap sa mga balota.
Si Reluya miduso og election protest ngadto sa korte tungod sa iyang pagtuo nga may nahitabong pagpanikas sa election gikan sa kampo sa ilang kaatbang sa politika.
Sa pagkakaron ang korte nagpadayon sa pagdungog sa election protest ni Reluya sa tinguha nga mahuman dayon ang gipangayong recounting sa mga balota sa lungsod sa San Fernando. – BANAT NEWS