Kalabera sa babaye napalgan sa Buhisan

CEBU, Philippines - Bukog ug kalabera sa gituohang dalaga ang napalgang nagkatag diha sa kakahuyan sulod sa Department of Natural Resources (DENR) sa sitio Linsa sa barangay Buhisan ning dakbayan.

Ang nakakaplag mao sila si Alejandra Henerali, 50, molupyo sa sitio Puti barangay Buhisan kuyog sa duha ka mga bata nga nangahoy.

Matud pa ni PO2 Jodan Batucan sa Homicide Section base sa imbestigasyong gihimo ni SPO2 Rey Cuyos nga niadtong Huwebes sa hapon nangahoy sila si Henerali sa nahisgutang lugar dihang ilang nabantayan ang mga bukog.

Sa ilahang pagsusi og maayo diha nalang nila masayring iya kini sa tawo hinungdan nga dali silang misumbong sa mga barangay tanod ug ang mga tanod na maoy misusi sa dapit.

Samtang gisusi ang mga bukog, duna usab nasigpatan nga mga sinina sama sa jacket nga itom, puti nga blouse nga adunay design nga bulak ug maroon nga panty duol sa bukog. Ang kapolisan mao nay mihipos sa mga bukog ug midala niini ngadto sa Saint Francis Funeral Homes alang sa posibleng pag-awtopsiya ug pagtino kun iya ba gyud kini sa babaye o sa lalaki.  – BANAT NEWS