2 ka drug pusher nasikop

CEBU, Philippines - Duha ka mga suspetsadong tigpayuhot og ginadiling drugas nasikop sa kapolisan sa dakbayan sa Mandaue atol sa buy bust operation ug sa gisilbing orden de aresto sa miaging adlaw.

Ang nasikop sa buy bust didto sa Barangay Mantuyong mao si Archie Panag, 18, ulitawo, nga taga Mantuyong, samtang ang nasilbihan og warrant of arrest ug naposasan mao si Elesio Parawan, alyas Kumander, 34, minyo nga taga barangay Cambaro.

Si Police Inspector Henrix Bangcolita sa Precinto 1 sa Mandaue City Police Office mibutyag sa Banat News nga pinaagi sa ilang decoy, (usa ka polis nga nagpakaaron ingnong sibiliyan nga mipalit og shabu), nagkangkang ang mga kamot ni Panag nga midawat sa P100 nga marked money dayon mihatag usab siya og gamay’ng pakete nga matud niya shabu ngadto sa decoy.

Dihadiha giposasan dayon sa kapolisan sa Panag kinsa giingong idlas ug dangog kaayo hinungdan nga dugay kaayong nasikop   luyo sa kabaniog na sa ngalan niini nga tigpayuhot og illegal nga drugas sa ilang dapit.

Samtang si Parawan usab giingong daan na kining nakarga sa drug watchlist sa kapolisan apan gumikan gihapon sa iyang kadangog, nakaipsot kini sa gipahigayong buy bust operation niadtong miaging Pebrero ning tuiga didto sa Cambaro.  – BANAT NEWS