Sa Compostela, ABC President di makalingkod nga OIC-Mayor

CEBU, Philippines - Miluwat na og pormal nga kamanduan ang Department of Interior and Local Government (DILG-7) pagbakante sa pwesto pagka mayor sa lungsod sa Compostela.

Si DILG-7 Pedro Noval miluwat sa maong kamanduan bisan paman mirekomendar na si outgoing mayor Ritchie Wagas nga si Association of Barangay Councils President Felijur Quiño nga maoy himuong officer-in charge sa munisipyo.

Ang petisyon ni Wagas ngadto sa Comelec nag-awhag sa pag-annul sa proklamasyon ug inugurasyon sa mga mananaog nga kandidato sa milabay’ng piniliay gumikan sa mga pasangil nga anomalya ug nanawagan nga ipa-manual recount ang mga balota.

Tungod sa maong petisyon mipagawas og kamandoan ang Comelec 2nd Division nga nagdapig sa petisyon ni Wagas ug mimando nga wala makalingkod hangtud nga dili ma-recount ang mga balota.

Ang kamandoan nakamugna kini karon og kagubot tali sa mga supporter sa midaog nga mayor nga si Joel Quiño, bise mayor ug walo ka konsehal ug sa habig ni Wagas.

Si ABC president Quiño nga maguwang sa midaog nga mayor maoy campaign manager ni Wagas ug girekomendar sa naulahi nga temporaryong mo-asumir pagkamayor human mapupos ang iyang termino niadtong petsa 30 sa Hunyo sa udto.

Ang kapolisan mipadala na og dugang sakop sa Regional Mobile Group ug mga sakop sa Special Weapons and Tactics.

Apan kagahapong adlawa miluwat og kamanduan si director Noval ngadto kang ABC president Quiño pagbakante sa maong posisyon tungod kay subay sa balaod wala kini legal authority nga mo-asumir pagkamayor.

Matud pa sa kopya sa gipadalang kamandoan nga gipadala usab dinhi sa Banat News mipahibalo kang Quiño nga ‘misplaced’ ang gibasehan niining balaod aron makalingkod siya isip OIC-mayor.

Sumala pa sa kamandoan gumikan kay dili makunsiderar nga mga ex- officio members sa konseho ang ABC president ug Sangguniang Kabataan Federation base sa Section 44, 45 ug 46 sa Local Government Code of 1991.

Pagkakarun wala pay naka-asumir nga mayor sa maong lungsod hinungdan nga gipaabot karun ni director Noval ang kamanduan gikan sa ilang ulohang buhatan kun si kinsa ang temporaryong itudlo nga modumala sa lungsod hangtud dili masulbad ang maong kagubot.

Si Noval mipahibalo usab nga kun ugaling wala gyuy mapiling mananaog, bugtong ang presidente lamang sa nasud maoy makatudlo kun si kinsa ang iyang ibutang nga officer-in charge. – BANAT NEWS