Mga politiko indibiduwal nga may 'wangwang' gibaharan sa LTO-7

CEBU, Philippines - Gimandoan na sa Land Transportation Office (LTO-7) ang tanang mga motorista apil na kadtong mga politiko sa pagtangtang sa ilang mga blinkers ug wangwang sa ilang mga sakyanan aron dili kini madakpan.

Si LTO-7 director Raul Aguillus mihimo sa maong kamandoan subay usab sa direktibang giluwatan ni Presidente Benigno ‘Noynoy’ Aquino III batok niadtong mga motoristang mogamit og wangwang nga gihulagway niining daw sama sa ‘naghari-hari’ sa kadalanan.

Aron pagpakitang siya bisan usa ka presidente mahimong mosanong sa lagda sa trapiko wala mogamit og wangwang ang convoy ni Aquino sa iyang mga lakaw-opisyal.

Gani kagahapong adlawa na-late si Presidente Aquino sa turn-over ceremony sa pag-asumir sa bag-ong Armed Forces of the Philippines Chief of Staff Lt. Gen. Ricardo David human matanggong sa trapiko diha sa Cubao sa Edsa, Quezon City.

Si Aguilus miluwat na og kamanduan sa tanang mga deputized agents lakip na sa City Traffic Operations Management aron motabang og monitor niadtong dili awtorisadong pagamit og wangwang sa mga sakyanan.

Hinuon giklaro ni Aguilus nga sukad niadtong miaging adlaw human sa pag asumir ni Aquino wala pa silay nadakpang motoristang dunay mga siren.

Lakip sa gidili ni Aquino ang ‘counter flows’ sa mga sakyanang mopakaaron-ingnong importanteng tawo nga mogamit og wangwang pagsubay sa dalan.

Dugang ni Aguilus molusad sila og subsub nga mga operasyon sa kalungsoran pagsusi niadtong mga sakyanan nga pabiling nagtaud og blinkers ug siren aron kini dakpon ug sakmiton.

Gipasalig hinuon ni Aguilus nga patas ug walay pagpinig ang ilang pagpatuman sa balaod batok niining dili awtorisadong pagamit og wangwang.

Base sa balaod, ang LTO maoy nag-unang ahensya sa gobiyerno nga mopatuman sa Republic Act 4136 ug Presidential Decree 96 nga nagmando sa husto ug higpit nga paggamit sa wangwang ug blinkers.

Bugtong ang gitugutang makagamit niini mao ang PNP, kabomberuhan, military, emergency vehicles, Senate President, Speaker of the House ug ang Presidente lamang sa Pilipinas maoy gitugutang makagamit og wangwang ug ang uban wala na. – BANAT NEWS