Mayor Rama misaad og kalamboan

CEBU, Philippines - Si Mayor Michael Rama miisip sa dakbayan sa Sugbo nga usa ka barko nga siya maoy kapitan ug iyang gipaniguro nga ubos sa iyang pagpanimon modunggo kini sa pantalan sa kalamboan.

Namulong atol sa inaugural session sa konseho sa dakbayan kagahapon sa buntag, si Rama miingon nga sakay na sa iyang barko karon si Dr. Tomas Fernandez nga mibulontaryo pagtabang nga molambo ang Cebu City Medical Center.

Si Fernandez giila nga batid kaayo pagdumala sa CCMC ug City Health Department kaniadto, apan mi-resign kay mihukom nga modumala og pribadong health facility — ang Friendly Care diha sa Plaza Independencia.

Wala pa hinuon ibutyag ni Rama kun si Fernandez na ba ang iyang ihulip ni Dr. Myrna Go nga mao karon ang hepe sa CCMC kinsa gihulagway nga walay maayong performance pagdumala sa ospital.

Matud sa mayor nga huot kaayo ang atong mga merkado ug daghan ang nag-ilaid sa kalisud, apan sigurado ang mayor nga masungasong ra kining maong kalisdanan.

Gibutyag usab ni Rama nga ubos sa iyang administrasyon sulbaron niya ang problema sa mga sidewalk vendors nga gihulagway sa uban nga naghatag og kasamok sa aseras sa dakbayan.

Ang plano sa mayor mao nga palambuon ang programa sa Department of Manpower Development and Placement (DMDP) aron motudlo kini og pamaagi sa mga sidewalk vendors nga mahimong lehitimong negosyante.

Naminaw sa pagpamulong ni Rama sa session hall ang mga department heads sa City Hall nga iyang giingnan nga motrabaho gyud aron dili sila mahulipan sa katungdanan.

Gusto ni Rama nga ipatuman ang gitawag og “inverted pyramid” diin hatagan og higayon kadtong mga anaa sa ubos og katungdanan nga maprobahan ang ilang katakus nga dili na magsalig og kamandoan.

Gipasalig pagsubli ni Rama nga likayan gyud sa iyang administrasyon ang pagpatrabaho sa iyang mga kabanay diha sa City Hall ug misaad nga subayon niya ang tunob sa iyang apohan nga si Don Vicente Rama kinsa mipadagan sa syudad nga minus og pamolitika.

Sa laing bahin, gikauyonan nga usbon na ang adlaw sa pagpahigayon sa sinemanang sesyon gikan sa Miyerkules sa hapon himoon na kini matag Biyernes sa buntag aron sa paghatag og higayon nga dunay taas nga oras ang pagtuki sa mga mahinungdanong isyu. – BANAT NEWS