'Middle man' himuong state witness

CEBU, Philippines - Himuong state witness ang unang nadakpan sa Task Force Ting nga giingong “middle man” tali sa mastermind sa pagbanhig kang Nicolas Ting niadtong Hunyo 21 diha sa barangay Cabancalan sa dakbayan sa Mandaue.

Si PRO-7 Chief Supt. Lani-O Nerez sa pakighinabi niini sa mga tigbalita kagahapon mitug-an nga iya nang gitug-an sa ilang mga abogado aron ilang tun-an kun angayan bang himuong state witness si Edwin Juab nga taga Ermita ning siyudad ug founder sa Trese Hudas Gang.

‘Mahimo man na siyang ikunsiderar nga state witness kay makaingon ta nga daghan pud siyang nahibaw-an, apan kana lagi atong tan-awon ang degree of participation before he (Juab) will be considered as state witness,” matud pang Nerez.

Si Juab maoy unang gipik-ap sa kapolisan ug misaysay sa tanan niyang kalambigitan sa krimen nga maoy naghatag og yawe sa kalampusan sa kapolisan aron madakpan ang gipasanginlang mastermind nga si Larry Ting ug laing duha pa nga naglakip niini sa 16-anyos nga menor de edad nga triggerman ug ang drayber sa motorsiklo nga si Jordan Miral nga taga Ermita.

Matud ni Nerez nga lig-on ang ilang gihuptang ebidensya batok sa mga suspek nga mahimong makombikto gyud ang mga akusado ug giisip nilang sulbad na ang kaso ni Nicolas Ting. Apan sa kaso sa maguwang ni Ting nga si Manuel Ting kinsa gibanhigan patay pagkasunod adlaw ila pa kining palawman aron mahibaw-an ang motibo ug ang mastermind niini, hinuon ila nang nailhan ang gunman ni Manuel.

“Kanang ka Manuel Ting makaingon ta nga maayo pud ang dagan, identified ang gunman ug atong tan-awon kinsay posibleng nagsugo, kinsay posibleng nagkontak sa gunman,” pasabot pa ni Nerez.

Giklaro hinuon ni Nerez nga nana silay ideya si kinsa ang posibling mastermind sa pagbanhig patay kang Manuel Ting, apan ang ilang gihimo niini susama sa ilang gihimo sa kaso ni Nicolas Ting.

Sa pikas bahin si Sr. Supt. Patrocinio Comendador, hepe sa kapolisan sa dakbayan sa Sugbu nagkanayon nga kagahapon sa hapon pormal nang napasakaan og kasong frustrated murder ang upat ka mga suspetsado sa kaso ni Nicolas Ting.

Ang kasong illegal possession of firearms batok sa gunman ni Nicolas Ting nga 16-anyos nga menor de edad nga lalaki ug sa ig-agaw niining sa Janstel Flores didto gipasaka sa piskaliya sa dakbayan sa Lapulapu.

Ang 16-anyos nakuhaan og usa ka .45 nga kalibre sa pistola nga may pito ka buhing bala samtang ang ig-agaw niini nakuhaan usab og usa ka 357 revolver ug .45 nga kalibre sa armas nga may mga buhing bala.  – BANAT NEWS