Masangkay gidut-an og unlan sa nawong

CEBU, Philippines - Si kanhi Regional State Prosecutor Hernando Masangkay gituohang gidut-an og unlan sa nawong base sa resulta sa autopsy nga gihimo ni Dr. Nestor Aprecio Sator, medico legal officer sa Philippine National Police (PNP) Crime Laboratory.

Base sa resulta sa autopsy, dunay nakitang luta o lagom sa tuong bahin sa nawong, ilong, walang bahin sa dunggan ug ubos nga bahin sa walang dunggan ni Masangkay timailhan nga dunay pressure nga gigamit.

Gawas sa maong resulta, dunay nakitang laing samad dinunggaban sa walang bahin sa iyang abaga nga dunay usa ka pulgada ang giladmon ug samad dinunggaban sa li-og nga maoy hinungdan sa iyang kamatayon.

Nasuta usab sa autopsy nga ang biktima nakainom kini og ilimnong makahubog sa wala pa mamatay.

Si Supt. Henry Biñas, hepe sa Talisay City Police Station mihangyo sa kabanay sa biktima nga hatagan pa sila og dugang lugway sa pagsulbad sa kaso.

Matud niini nga padayon pa silang nangita ug naghipos og mga impormasyon sa tulo ka mga batan-ong lalaki kinsa giingong dunay nakakita nga nagsugba-sugba ug nag-inom pa diha sa balay ni Masangkay niadtong wala pa kini makit-ing patay.

Kahinumduman nga si Masangkay napalgan nga wala nay kinabuhi nga nagbuy-od ibabaw sa iyang kama sulod sa iyang kwarto diha sa iyang balay sa Phase 3D Camella Homes, barangay Lawaan I, dakbayan sa Talisay sa iyang pag-umangkon ug kumpare nga si Karl Stephen Montenegro ug Jeffrey Joven.

Usa sa gitutokan sa mga polis nga motibo sa maong hitabo mao ang personal nga away tungod kay wala mawagtang ang kwarta, cellphone, uban pang personal nga butang sa biktima ug lakip na ang mga butang niini sa iyang balay apan wala usab isalikway sa mga polis ang ubang mga anggulo.

Ang minor de edad nga giingong drayber sa biktima kinsa boluntaryong mipaubos sa iyang kaugalingon sa imbestigasyon padayon usab kining mi-coordinate sa mga polis.

Kahinumduman nga ang maong bata mibutyag sa mga polis nga niadtong buwan sa Marso niining tuiga nagtrabaho siya kang Masangkay isip drayber apan niadtong buwan sa Mayo ning tuiga miundang na siya tungod kay nakatrabaho siya diha sa usa ka spa nga nahimutang sa uptown area, dakbayan sa Sugbo.  – BANAT NEWS