100 ka polis gipakatap sa Compostela

CEBU, Philippines - Dul-ang 100 ka mga sakop sa Regional Mobile Group ang gipakatap sa lungsod sa Compostela sugod kagahapon sa buntag aron pagbantay sa municipal hall gikan sa posibleng pagtumaw sa kagubot tungod sa gipagawas nga kamandoan sa Commission on Elections (COMELEC) 2nd division nga nag-anular sa proclamation ug nagdili sa pagpalingkod sa napiling mayor ug mga konsehal sa maong lungsod.

 Kini ang gibutyag ni Compostela Police Station Chief, Sr. Insp. Rodrigo Giangan pinaagi ni SPO3 Pedro Enriquez kinsa mitaho ngadto kang   Cebu Provincial Police Office director, Sr. Supt. Erson Digal nga gibantayan sa kapolisan ang mga nagtapoktapok nga dili mominus 100 ka mga tawo kinsa gituohang mga supporter sa mga kandidato sa maong lungsod sa palibot sa munisipyo.

 Matud pa ni Enriquez nga ang mga Crowd Dispersal Unit (CDU) nga mga polis gipangulohan ni Police Insp. Corpus apan ubos gihapon kini sa pagdumala sa hepe sa kapolisan sa lungsod nga si Sr. Insp. Giangan.

 Nasayran nga ang katuyoan sa pagbutang sa maong mga CDU police mao ang pagpakgang sa posibleng pag-ulbo sa tensiyon sa maong lungsod karong nagmagahi si outgoing mayor Ritchie Wagas sa pagkanaog gikan sa katungdanan.

Si Wagas miingon nga samtang dili pa mahuman ang pag-ihap pag-usab sa mga balota sa lungsod human sa piniliay niadtong miaging Mayo 10, dili gayud siya manaog sa iyang katungdanan.

Kini tungod kay gusto niyang masuta kun napildi ba gyud siyang tinuod sa iyang kaatbang nga si Quinio.

Si Enriquez miingon nga ang maong mga police nagpaabot sa mando ni Regional Director Pedro Noval sa Department of Interior and Local Government (DILG)-7 kun si kinsa ang itudlo niining Officer-In-Charge sa lungsod.

 Gipahibawo usab niya nga magpabilin sa Compostela ang maong police hangtud nga may matudlo ang COMELEC nga legal nga mga opisyales sa lungsod sa Compostela. –  BANAT NEWS