Napusilan gipriso kay armas way lisensya

CEBU, Philippines - Naangol ang usa nga nagpailang drayber sa Mobile Patrol Group (MPG) sa dakbayan sa Sugbo ug ang silingan niini dihang gibanhigan sila ug gipusil didto sa Mansueto Subdivision, sa barangay Bulacao, dakbayan sa Talisay kagahapon sa buntag.

Ang mga biktima mao sila si Jose Jerry Leonardo , 43, ug Joselito Tapik, 29, pulos taga Mansueto subdivision samtang ang suspetsado silingan ra usab nila nga si Gilbert Cabigas, hingkod.

Apan gidimalas si Leonardo kay imbis ihatod sa tambalanan kay nasamdan ang kilid, didto hinuon kini ipaslak sa prisohan sa kapolisan sa Talisay kay nagdala kini og .45. kalibreng pistola nga walay lisensya.

Si Tapik gihatod dayon ngadto sa Vicente Sotto Memorial Medical Center sa dakbayan sa Sugbo kay samdan kini sa sampot.

Sila si PO3 Mikie Espina ug PO2 Leandro Azarcon sa Talisay City Police Office mibutyag sa Banat News nga nagmaneho si Leonardo sa iyang multicab kauban si Jimmy Mindahao nga hepe sa Chevron Security and Investigation Agency ug usa ka retiradong sundawo sa army subay sa dalan sa Mansueto Subdivision.

Apan si Tapik nga naagian nilang naglakaw mikapyot sa multicab dihang kalit lang mitumaw si Cabigas ug gipusil dayon si Tapik.

Human masabak sa sampot, giusban pa kini pagpusil apan nakalihay ug ang bala didto na moigo sa kilid ni Leonardo.

Human makaigo, misibat usab dayon si Cabigas pahilayo sa maong lugar.

Si Mindahao wala maigo sa bala, apan dihang gisusi sa kapolisan, nasakpan nga walay lisensyang armas ni Leonardo diha sa iyang multicab hinungdan nga gitanggong dayon kini sa Talisay detention cell.

Nasuta sa kapolisan nga si Tapik ug Cabigas maoy nagdinumtanay ug karon padayon pang gipangita sa kapolisan ang suspetsado.  –  BANAT NEWS