Imbestigasyon sa kamatayong Masangkay gipalawman

CEBU, Philippines - Ang kapolisan sa dakbayan sa Talisay mipalawom pa sa imbestigasyon kabahin sa pagpatay ni retired Regional State Prosecutor Hernando Masangkay.

Matud pa sa hepe sa Talisay City Police Station (TCPS) nga si Superintendent Henry Biñas sa pakighinabi niini sa Banat News kagahapon nga gipangita pa nila ang tulo ka mga batan-on kinsa giingong kauban ni Fiscal Masangkay niadtong Biyernes sa hapon.

Base sa taho nga may nakakitang nag-inom ang maong mga batan-on sa sulod sa balay sa biktima.

Si Biñas nagkanayon nga ang ilang gitutokan nga motibo karon sa hitabo mao ang personal nga away apan wala nila isalikway ang uban pang mga anggulo.

Ang usa ka menor de edad kinsa giingong drayber sa biktima boluntaryong mitungha sa buhatan sa kapolisan sa barangay Poblacion, Talisay niadtong Domingo sa gabii ug giimbistigar kini sa mga polis apan gipapauli usab kini human masukit-sukit.

Matud ni Biñas nga ang maong menor de edad mibutyag nga mitrabaho siya isip drayber sa biktima niadto lang buwan sa Marso niining tuiga apan miundang siya niadtong Mayo kay nakatrabaho na siya sa usa ka spa nga nahimutang sa uptown, dakbayan sa Sugbo.

Kahinumdoman nga si Fiscal Masangkay patay nang naabtan sa iyang pag-umangkong si Karl Stephen Montenegro ug sa iyang kumpare nga si Jeffrey Joven niadtong Domingo .

Nagbuy-od kini ibabaw sa iyang kama sulod sa iyang lawak sa iyang balay sa Phase 3D, Camella Homes, barangay Lawaan I, dakbayan sa Talisay nga naglunang sa kaugalingong dugo ug may usa ka samad dinunggaban sa li-og.

Gituohan nga kaila ug suhito sa sulod sa balay ang kriminal tungod kay ang mga polis walay nakitang timailhan nga gipugos sa pag-abli ang pultahan niini ug giingong dili usab kawat ang motibo sa pagpatay sa biktima tungod kay wala mawagtang ang kwarta , cell phone, mga alahas ug mga gamit sa balay niini.

Gituohan usab sa mga polis nga natulog ang biktima dihang gidunggab kini tungod kay ang mga polis walay nakita nga timailhan nga nakasukol pa si Masangkay batok sa mamumuno.  – BANAT NEWS