Mananaog sa Compostela di pa makalingkod

CEBU, Philippines - Ang Commission on Elections kon COMELEC 2nd Division mipagawas og kamanduan nga nag-anular sa proklamasyon sa tanang nakadaog nga kandidato sa lungsod sa Compostela.

Ang kamanduan nga giluwatan sa Presiding Commissioner sa 2nd Division nga si Commissioner Nicodemo Ferrer giisyu niadtong Hunyo 28, 2010 ug personal nga gikuha sa napilding si Compostela Mayor Ritchie Wagas sa Comelec Manila. Usa sa suod nga kawani ni Wagas nga si Jaime Sinco nagkanayon nga ang siyam ka pahinang kamanduan nagpugong sa paglingkod sa mga nakadaog gikan sa pagkamayor, bise mayor ug apil na ang pito ka mga konsehales.

Gihatagan og gibug-aton sa Comelec ang election protest ni Wagas nga nagkwestyon sa tinuoray’ng resulta sa election niadtong Mayo 10, 2010 gamit ang Precinct Count Optical Scan kon PCOS machine ug gimando ang manual counting. Ang termino ni Wagas opisyal nga matapos karong adlawa ug gipaabot nga ang Department of Interior and Local Government mao nay motudlo kun si kinsa ang temporaryong palingkuron.

Kahinumduman nga nanumpa na ang nakadaog nga mga opisyales sa lungsod sa Compostela atol sa pagbisita ni Presidente Gloria Macapagal Arroyo dinhi sa Sugbu niadtong Hulyo 28, 2010 sila si bise mayor ug mayor-elect Joel Quiño ug Mary Antonette Dangoy ug walo ka mga konsehales. – BANAT NEWS