Local LP nanumpa

CEBU, Philippines - Pormal nanumpa sa katungdanan ang mga nakadaog nga mga kandidato ubos sa Liberal Party dinhi sa Sugbu nga gipangulohan ni Bise Gob. Gregorio Sanchez diha sa Mariners Court sa sulod sa Fort San Pedro sa dakbayan sa Sugbu.

Kauban ni Sanchez sa iyang paghurar atubangan ni RTC-7 Executive Judge Mienrado Paredes ang iyang kinatibuk-ang pamilya human sa usa ka Santos nga Misa nga giselebrar ni Rev. Fr. Joseph Anore. Human sa paghurar ni Sanchez, siya na usab ang niadminister sa oathtaking sa mga mayor ubos sa Liberal Party nga mao sila si San Fernando mayor-elect Antonio Canoy, Mandaue reelected Mayor Jonas Cortes ug uban pang mga mayor ug mga konsehales sa kalungsuran.

Mitambong usab sa maong oathtaking ang napilding kandidato sa pagkagobernador sa LP nga si kanhi Cebu City Councilor Hilario ‘Junjun’ Davide III. Sa iyang mensahe, si Sanchez nagkanayon nga bisan og gamay ra silang nakadaog sa Hunta Probinsiyal magpabilin silang oposisyon ug mobabag sa mga proyekto ni Gob. Gwendolyn Garcia nga dili paborable sa mga Sugbuanon.

Hinuon iyang gitataw nga mopaluyo siya sa gitinguha ni Garcia nga solar power projects aron magamit pagpasuga sa mga poste sa kadalanan, samtang giisip niyang ambisyoso ang laraw ni Garcia nga bulk water projects sa tibuok probinsiya tungod kay gastoso kaayo kini ug misugyot nga mas maayo pa nga ang mga pribadong mga negosyante ang mo-invest sa maong proyekto ug dili ang probinsiya sa Sugbu. – BANAT NEWS