Mahuyang nalumos

CEBU, Philippines - Patay na nga napalgan kagahapon sa buntag sa kadagatan sa barangay Poblacion, dakbayan sa Talisay ang usa ka mahuyang kinsa gituohang nalumos sa dagat.

Hangtud sa pagsuwat niining balita wala pa mailhi ang biktima apan nasayran gikan sa kapolisan nga may 50-anyos na ang pangidaron niini, 5’2 ang gitas-on, ug puti-on ang pamanit, nagsul-ob og maong nga karsones ug puting t-shirt

Base sa imbestigasyon sa kapolisan, mga may nakasaksi pa nga nakakita sa biktima sa alas 5:00 sa buntag kagahapon nga nag-inusarang naligo sa dagat. Apan human sa duha ka oras, nakit-an na lang kining milutaw sa dagat diin siya maligo.

Ang mga life guard nga diha sa lugar daling mitabang sa nahisgutang mahuyang ug gidala kini sa baybayon.

Ang Talisay Rescue Emergency Action Team (TREAT) dali usab nga miresponde apan nasuta nila nga kapin na sa duha ka oras nga namatay ang biktima.

Gituohan nga ang maong mahuyang naanod sa sulog paingon ngadto sa lawom hinungdan nga nalumos kini. – BANAT NEWS