Gumikang way cellphone gipusil sa tulisan

CEBU, Philippines - Gumikan kay walay cell phone, gipusil sa mga tulisan ang usa ka trabahante sa fast food sa mall didto sa eskina Gil Tudtud ug MJ Cuenco Avenue sa barangay Mabolo ning dakbayan sa Sugbo kagahapon sa alas 2:15 sa kaadlawon.

Ang biktima nailhan sa kapolisan nga si Mark Oliver Brigole, 22, ulitawo nga usa ka trabahante sa usa ka fast food sa usa ka mall sa north reclamation area ning dakbayan sa Sugbo.

Ang biktima nga nainterview sa kapolisan didto sa tambalanan mibutyag nga samtang nagsakay siya og jeep pasaheroan paingon sa ilang balay gikan sa iyang trabahoan, may kauban siyang duha ka lalaking pasahero usab.

Apan samtang nagdagan ang sakyanan gitionan siya og armas de fuego ug gipangutana siya kun aduna ba siyay cell phone.

Busa giablihan niya ang iyang bag pagpahibawo nga wala gyud siyay cell phone.

Unya ang tulisang naglagot, gipabuthan gyud siya sa armas ug ang bala niini miigo sa iyang bukton nga milapos usab sa iyang kilid.

Gihatod dayon siya ngadto sa Cebu City Medical Center, samtang gipangita pa sa kapolisan ang mga tulisan. - Melanie Beltran ug Lesley Caminade (BANAT NEWS)