Ex-rebels hataga'g balay

CEBU, Philippines - Mga rebel returnees nga walay kapuy-an aduna na unyay kapasilungan sa gihimong Kalayaan Resettlement Center (KRC) sa barangay Remedios, Danao, Bohol nga pormal nga gibuksan kagahapon.

Ang 18 ka panimalay nga adunay duha ka kwarto, sala, ug banyo nga gibuksan ni Bohol outgoing Gob. Erico Aumentado kabahin sa 25 housing units nga gitukod sa 50-ektaryang luna nga mahimong katamnan ug kapuy-an. Ang pito ka nahibiling unit sugdan og himo inig gawas na sa pundo gikan sa Bohol Provincial Government, President’s Social Fund ug sa Office of the Presidential Adviser on Peace Process (OPAPP).

Ang maong mga panimalay nagkantidad og P1,440,000 sa presyong P80 mil matag unit.

Si Col. Ramon Evan Ruiz, Commanding Officer, Engineer Support Battalion, 53rd Engineer Bridge nga nagbase sa Tubigon, Bohol nagkanayon nga natapos nila ang maong mga balay sulod lang sa duha ug tunga sa bulan sukad nga kini gisugdan niadtong Pebrero.

Ang unang makadawat ug makapuyo sa maong mga balay mao ang kinse ka mga rebel returnees ug mga sakop sa Bohol Composite Farmers Cooperative.

Samtang ang nahibiling tulo, ipa-raffle sa napulo ka mga resident beneficiaries. Ug ang nahibiling buhatunon pang pito ka units ipa-raffle gihapon ngadto sa resident beneficiaries. – BANAT NEWS