CV kuwang gihapon og kuryente - VECO

CEBU, Philippines - Nagkulang na usab ang suplay sa kuryente sumala pa sa gipagawas nga pamahayag sa Visayan Electric Company (VECO) hinungdan sa pagpatuman na usab nila og duha ka oras nga rotation brownouts sa ilang mga service area sa Metro Cebu Area.

Matud pa sa tigpamaba sa VECO nga si Ethyl Natera sa interbyu sa DyRF nga sugod niadtong adlaw nga Domingo pa nila gipatuman ang rotation brownouts tungod kay miabot man og 220 ka megawatt ang power shortage sa Central Visayas.

Si Natera nagkanayon nga ang mga opisyales sa National Grid Corp. of the Philippines(NGCP) mipahibawo kanila nga ang mga power generation company nakasugat na sad og problema sa ilang mga planta hinungdan nga gamay ra ang mahatag niining supply sa kuryente.

Sigon pa ni Natera, ang power plant sa dakbayan sa Naga nga maoy usa sa gisaligan nga mosuplay sa VECO gipaubos usab sa maintenance.

Iyang gitataw nga ang mga power generators dinhi sa Central Visayas nga nagpadayon sa paghatag og power supply sa VECO wala sad magdagan sa ilang full capacity kay under observation pa ang operasyon niini.

Gipahibawo usab ni Natera nga ang ilang gisaligan nga Luzon Grid wala sab makahatag og igong suplay sa Visayas Grid tungod kay may problema sad sa suplay sa maong lugar.

Si Natera nagkanayon nga ang usa ka oras nga rotation brownout nagsugod niadtong adlaw nga Domingo apan ang duha ka oras nga brownout ilang gipatuman sugod sa alas 8:00 ang takna kagabii. – BANAT NEWS

Show comments