CEBU, Philippines - Nakaeskapo ang duha ka mga binilanggo sa Lapulapu City jail gumikan sa sobrang pagsalig sa mga sakop sa Bureau of Jail Management and Penology sa milabay’ng Sabado sa gabii.
Ang nakaeskapo mao si Alfe Lopez, 28, residente sa barangay Mahayahay lungsod sa Cordova nga nag-atubang og kasong pagpangawat ug Rolando Amistad, 27, nagpuyo sa barangay Agus dakbayan sa Lapulapu nga may kasong kalapasan sa RA 8294 kon paghupot og armas nga walay lisensiya ug kalapasan sa Comelec gun ban.
Base sa pamahayag ni Jail Supt. Isabelo Cartin Jr., ang duha ka mga binilanggo maoy ilang gipatrabaho sa ilang gihimong extensions sa edipisyo nga diin himuon ang livelihood program gikan sa Mactan Economic Processing Zones alang sa mga binilango.
Apan human sa trabaho, nadiskubrehan nila sa gihimong headcount sa mga binilanggo nga wala na sila si Lopez ug Amistad.
Daling gialerto ang tibuok pasilidad ug diha nila madiskubrehe ang gitrabahoang edipisyo sa duha ang damba nga gigamit sa pagpamintal maoy ilang gigamit paglayat sa pader gawas sa maong bilanggoan.
Gumikan niini gitahasan ni Supt. Cartin ang jail guard on duty nga si JO1 Darwin Denila ug ang officer of the day nga si JO2 Merilito Zamora sa pagpangita sa maong mga binilanggo.
Si Lopez nasikop pagbalik mga alas 9:00 sa milabay’ng buntag human kini mouli sa ilang panimalay sa Mahayahay, Cordova gumikan kay gimingaw kini sa iyang pamilya nga wala na moduaw kaniya sa dugay nang panahon.
Giangkon ni Lopez nga gigamit nila ang damba sa ilang pag-ikyas apan wala siya’y kasayuran kun asa motago si Amistad sanglit nagbuwag dayon sila human makaeskapo. (BANATNEWS)