Biktima sa ambush ilubong karon

CEBU, Philippines - Ilubong na karung buntag sa usa ka pribadong sam-ang diha sa barangay Cabancalan sa dakbayan sa Mandaue ang magpapatigayong giambusan patay nga si Manuel Ting niadtong milabay’ng semana.

Atol unya sa paglubong, mopakatap og daghang polis diha sa palibot aron pagsiguro sa seguridad sa mga kabanay sa mga Ting gumikan niining duha ka nagsunod nga pagpamanhig nga naglakip usab sa pagkaangol sa manghod ni Ting nga si Nicolas Ting.

Si Jaybee Aquino Marcos, manager sa hotel nga gipanag-iya sa gipatay nga Ting ug tigpamaba sa maong pamilya mipasidaan atol sa media briefing kagahapon nga ilang gidid-an ang mga camera ug photographer nga mo-cover sa paglubong.

Sa alas-7 sa buntag dunay ipahigayong Santos nga Misa diha sa Saint Peter Funeral Parlor sa New Imus Road ug pagkahuman mosunod dayon ang lubong sa alas-9 sa buntag sa Angelicum Cemetery sa Barangay Cabancalan.

Ang mga sakop sa media nga mo-cover sa maong lubong nga magdala og sakyanan kinahanglan moparehistro sa ilang plate numbers sanglit aduna silay ipanghatag nga numero sa sakyanan niini.

Si Manuel Ting gibanhigan diha sa eskina sa F. Llamas ug San Jose sa barangay Tisa ning dakbayan ug karung adlawa maoy tangkod nga usa ka semana nga gipatay ang biktima.

Matud ni Aquino posibling human na malubong si Manuel Ting adunay press conference ang mga sakop sa pamilya aron pagtubag sa mga pangutana.

Si Sr. Supt. Patrocinio Comendador, hepe sa Cebu City Police Office (CCPO) miingon nga wala siya makadawat og request sa pamilya apan aduna na siyay mga personnel nga gitahasan sa pagbantay sa pamilya ug kabanay sa biktima.

“So far wala tay nadawat nga request regarding additional security but nevertheless. We are in close coordination with the family of the late Manuel Ting,..I will do the appropriate actions to ensure the safety during the burial,” matud pang Comendador.

Si Comendador dihang gipangutana sa mga sakop sa media kabahin sa giingong mga tawong gi-pickup sa dakbayan sa Carcar sa mga sakop sa Task Force Ting nagkanayon nga padayon pa gihapon ang ilang imbestigasyon.   (BANATNEWS)