Inugurasyon ni P.Noy OK na

CEBU, Philippines - Andam na ang seguridad sa inugurasyon ni President-elect Benigno Aquino III ugmang adlawa, apan ang aktwal nga security plan dili pa gyud plantsado hangtud nga dili maperpekto ang "dry run" nga giobserbahan sa mga awtoridad sumala pa sa report sa GMA News.

Mopakatap og 17,000 nga security forces ang Philippine National Police ugmang adlawa nga naglakip sa 5,000 ka polis sa NCRPO; 10,500 gikan sa Region 3 ug 4A, ug duha ka batalyon.

Si NCRPO Chief Supt. Roberto Rosales nagkanayon nga wala pay final nga plano sa seguridad sukad pa niadtong Domingo, karong adlawa ipahigayon ang final dry run sa inugurasyon.

Sa tradisyon, si Aquino gikan sa iyang balay sa Times Street sa Quezon City mohapit ni outgoing President Gloria Macapagal-Arroyo sa Malacañang ug magdungan og adto sa Quirino Grand Stand.

Ang tradisyon nagsimbolo sa pag-ilis sa gahum gikan sa outgoing ngadto sa incoming president sukad pa sa panahon ni Presidente Manuel Roxas niadtong 1946 dihang pormal nga gibalhin ni Presidente Sergio Osmeña ang gahum kang president-elect, Roxas. (BANATNEWS)