CEBU, Philippines - Napaslak sa prisohan ang duha ka managsuon human kini masakping nangawat og krudo sa trak sa ilang amo didto sa Kaoshon Street, north reclamation area, ning dakbayan sa Sugbo sa miaging kaadlawon.
Ang mga suspetsadpo mao sila si Alejandro Aliñabon, 34, minyo, ug drayber sa GHR Trading, nga taga lungsod sa Badian, ug ang iyang manghod nga si Jhonny Aliñabon, 22, nga maoy iyang helper.
Samtang ang biktima mao si Henry Yu Tan, 41, minyo, nga taga barangay Tabok, dakbayan sa Mandaue ug tag-iya sa trak nga gikawatan og krudo.
Ang kapolisan sa Mabolo mibutyag sa Banat News nga nasakpan sa akto ang managsoon nga nagdala sa usa ka container nga puno sa 25 litros nga krudo nga gipasuyop niini sa usa ka hose gikan sa tangke sa sakyanan sa iyang amo.
Apan samtang naglakaw sila sa karsada, may mga tanod nga nagpatrolya nga maoy misita dayon bahin sa ilang dala nga butang.
Dihang gisukitsukit sila sa mga tanod, nakatug-an sila sa tinuod nga ang maong krudo didto nila suyopa gikan sa 10 wheeler truck sa ilang amo nga si Tan. Dihadiha gibalhog sila sa prisohan sa Mabolo Police Station ug dihang gi-interview sa Banat News, ang mga suspetsado mitug-an nga napugos sila sa pagkawat sa krudo kay naglagot silang wala pabaliha og kuwarta sa ilang amo. - BANAT NEWS