CEBU, Philippines - Tungod sa utang nakulatahan ug nadunggaban ang usa ka tindero sa may eskina sa F. Cabahug ug dalan Juan Luna barangay Kasambagan ning dakbayan sa Sugbo sa miaging adlaw.
Ang biktima nailhan nga si Leonard Colita, 20, nga taga barangay Tayud, lungsod sa Lilo-an, samtang ang suspetsado nailhan usab nga sila Reynaldo “Ren-Ren” Solon, uban sa ig-agaw niini nga si Joebert “Opaw” Solon, 26, ug ang silingan niini nga si Louie “Pang-an” Anan, 26, nga taga sitio Zapatera-Barracks, sa barangay Luz.
Base sa inisyal nga imbestigasyon sa kapolisan nasayran nga samtang naninda ang biktima og mga prutas, kalit lang miduol kaniya si “Ren-Ren” ug gipaninglan sa iyang P600 nga utang.
Apan gumikan kay wala siya kuwarta, mibalibad ang biktima nga maoy nasuk-an sa mga suspetsado busa gitabangan siya og kulata ug dihang nabun-og na pag-ayo, gidunggab pa gyud ang dughan niini.
Gihatod dayon sa tambalanan ang biktima samtang nasikop usab sa kapolisan si Anan, ug ang manag-agaw nga Solon nakaikyas ug mao karoy gipangita sa mga otoridad. - BANAT NEWS