CEBU, Philippines - Nakasugod na og operate ang water system sa lungsod sa San Fernando human usab gisubhan ni reelected 1st district Kong. Eduardo Gullas ug outgoing San Fernando mayor Lakambini Reluya niadtong nakalabay’ng adlaw.
Ang maong water system natukod pinaagi sa paningkamot sa mga barangay official sa barangay Bulid ug karon 400 na ka mga balay ang nakapahimulos sa maong proyekto.
Sigon pa sa report nga ang kanihit sa suplay sa tubig ug nagkataas nga demanda sa katawhan niini maoy nagtukmod sa mga opisyales sa barangay nga moduol kang Gullas ug Reluya.
Ang maong proyekto gigahinan ni Gullas og P100 mil ug laing P100 mil gikan usab ni mayor Reluya.
Giawhag ni Gullas ang ubang local government units nga maningkamot usab aron makabaton og kaugalingong tinubdan sa tubig diha mismo sa ilang tagsatagsa ka mga barangay.
Samtang gitambagan ni Gullas ang mga opisyal sa barangay Bulid nga unahon gyud nila og serbisyo sa maong patubig ang ilang mga molupyo una pa mobaligya niini sa kasikbit nga mga dapit. - BANAT NEWS