Pagpakaon sa street children sa Talisay dakong hagit - Joavan

CEBU, Philippines - Tahas sa pag-atiman sa mga Talisay City Street Children Feeding Center sa barangay Maghaway, Talisay giisip sa modumala niini nga kontrobersyal nga sinagop sa mayor nga dakong hagit kaniya.

Sa pakighinabi sa Banat News kang Joavan Fernandez, nalipay nga gisaligan siya sa iyang amahang si Mayor Socrates Fernandez nga patabangon sa mga naglisod nga kabataan sa syudad.

Matud pa ni Joavan nga dako kining responsibilidad apan usa ka kahigayonan kaniyang mapakita sa uban nga aduna siya’y mahimong maayo sa iyang kinabuhi.

Gihimong sanglitanan ni Joavan ang usa ka higayon nga diin aduna siya’y gitabangang pamilyang naghigda daplin sa karsada sa usa ka sikat nga establisamento sa syudad sa Talisay. Ang maong pamilya iyang gipangitaan og kapuy-an.

Dugang pa ni Joavan nga ang iyang pagtabang og tawo walay pili mabata man o matigulang basta tabangunon.

“Ayaw hukmi ang usa ka tawo, suwayi sa og kuyog aron makasinati mo,” pahimangno pa ni Joavan ngadto sa mga tawong nagduda sa iyang sensiridad.

Midugang si Joavan nga usa lang siya ka simpleng tawo ug dili siya gusto og hasol bisan paman og adunay mga tawong nagpunay og duda sa iyang pagkatawo iya nalang kining gibaliwala.

Saysay usab ni Joavan nga human sa nahitabong kontrobersiya ngadto kaniya gusto niyang mo-pokus sa proyekto sa iyang amahan nga gisangon kaniya. -  BANAT NEWS