Gikan nag-disko gipamusil, 1 patay

CEBU, Philippines - Tulo ka lalaki usa niini patay nang nadangat sa tambalanan human sila pamusila sa wala mailhing mga kriminal kagahapon sa kaadlawon diha sa sitio Langub, barangay Can-asojan, dakbayan sa Carcar.

Ang mga biktima mao ang magsuong Jose, 22 ug Wilfredo Ambolode, 23, taga barangay Poblacion sa maong dakbayan ug si Janwine Lantape, 22, taga sitio Oliveros, Can-asojan.

Ang deputy police chief sa Carcar City Police Station nga si Insp. Patrocinio Baylosis nga nahinabi sa Banat News mibutyag nga ang magsuong Ambolode nakaangkon og mga samad pinusilan sa bukton ug dughan samtang si Lantape sa iyang ulo. Matud ni Baylosis nga ang tulo daling gidala ngadto sa Carcar City District Hospital apan wala na makaabot nga buhi si Lantape sa maong tambalanan samtang ang magsuong Ambolode gibalhin sa Vicente Sotto Memorial Medical Center tungod sa ilang kahimtang.

Ang tulo dunay laing kauban nga ilang higala nga naila lang sa ngalan nga “Clifford” kinsa nakadagan atol sa pagpamusil. Sa pasiunang imbestigasyon sa kapolisan nga ang mga biktima gikan sa gipahigayong disko diha sa sitio Langub alang sa kasaulogan sa ilang kapistahan kagahapon (Domingo).

Si Lantape maoy nagmaneho sa motorsiklo nga ilahang gisakyan ug naghunong-hunong kini tungod sa kalisod sa karsada ug sa paghiabot nila sa ngitngit ug mingaw nga lugar kalit lang silang gibanhigan.

Si Baylosis midugang nga usa sa gilantaw nilang motibo sa hitabo mao ang paregla tungod kay ang mga biktima dili mga badlungon ug dili usab sila mga sakop sa gang.

Ang kapolisan mipahigayon og follow-up nga imbestigasyon sa hitabo aron mailhan ang mga mamumuno. -  BANAT NEWS