Pag-ampo alang kang P.Noy maoy awhag ni Vidal sa mga Sugbuanon

CEBU, Philippines - Ang Simbahang Romano Katoliko miawhag sa mga sumusunod sa paggahin og pag-ampo alang kang president-elect Sen. Benigno ‘Noynoy’Aquino III sa iyang pagdumala unya sa gobiyerno sa nasud.

Si Aquino manumpa isip pangulo sa Pilipinas karong Hunyo 30 diha sa Quirino Grand Stand sa Manila City ug magsugod sa iyang pangatungdanan karong Hulyo 1 ning tuiga.

Kini bisan pa man og may nga baruganan ug programa si Aquino nga wala mauyuni sa simbahan tungod kay nahasupak kini sa adbokasiya ug pagtulon-an sa simbahang Katoliko.

Ang Archdioceses sa Sugbu nga gipangulohan ni Vidal mipagawas sa ilang panawagan ngadto sa publiko pinaagi sa ilang kaugalingong publikasyon nga Ang Bag-ong Lungsuranon.

Si Vidal ug ang archdioceses sa Sugbu misagop sa barugan sa presidente sa Catholic Bishop of the Philippines (CBCP) nga si Bishop Nereo Odchimar, miingon nga importante kaayong duyogan sa simbahan pinaagi sa pag-ampo ang bag-ong pangulo.

Kini aron matuman gyud niini ang gisaad nga kausaban sa pagdumala ug pagpadagan sa gobiyerno pinaagi sa pagsumpo sa kurapsyon ug pagtaral sa mga kurakot nga opisyal sa kagamhanan.

Matud pa niini nga makapaabot si Aquino og kooperasyon gikan sa simbahan apan kanunay silang magmabinantayon usab sa mga kasaypanan unyang iyang himuon.

“We will pray for him as president. We shall work together...wish him well and cooperate with his ideals that we could be in assistance not necessarily compromising our beliefs and our convictions particularly in matters of faith and morals,” nagkanayon si Bishop Odchimar.

Si Aquino nga misaad og kausaban ug wagtangon niini ang kurapsyon sa gobiyerno, wala maendorsar sa simbahan tungod sa baruganan niini sa isyu sa Reproductive Health Bill nga mipabor niini. Ang maong balaudnon natanggong pa karon sa kongreso pinaagi sa pagpaningkamot sa simbahan ug ubang pro-life groups sa nasud.  -  BANAT NEWS