CEBU, Philippines - Pagsulod sa mga Garcia sa Liberal Party dili kapugngan ug gibasol ni kanhi senador John Henry “Sonny” Osmeña ngadto sa iyang ig-agaw nga si outgoing Cebu City mayor Tomas Osmeña.
Si Sonny nagkanayon nga kun makasulod man ugaling ang mga Garcia sa LP kini gumikan sa kapakyas ni Mayor Osmeña pagtinuod sa iyang panganting babagan niya ang bisan unsa pa mang tinguha sa mga Garcia.
Ang Liberal Party mao karoy halinon o duolunon kaayong partido sa nasud human mangharos ang kasagaran sa ilang mga kandidato sa nasyunal ug lokal nga piniliay niadtong milabay’ng Mayo 10 nga piniliay.
Si LP standard bearer nga si president-elect Sen. Binigno “Noynoy” Aquino III gikatakdang manumpa sa posisyon karong Hunyo 30.
Gipaabot sama sa naandan nga dunay mga politiko gikan sa ubang partido ang magkarakara og tapon sa LP karong mga panahona.
Bisan paman sa paniguro sa LP nga dili sila basta modawat og buot mopasakop sa ilang grupo ug makig-alyansa, magkinahanglan gihapon sila og dugang miyembro aron masigurong mayoriya sa mga kongresista ug senador sa Kongreso ilaha.
Matud pa ni Sonny Osmeña, daan na niyang napanglantawan mapaltos gyud ang mayor sa iyang tinguhang mababagan ang mga Garcia nga makasulod sa Liberal Party.
Si Sonny Osmeña nagkanayon nga kun siya maoy pabut-on dili gyud angayang dawaton ang mga Garcia sa partido ni Aquino gumikan sa mga nanggawas nga mga alegasyong dunay kwestyonableng mga proyekto ang mga Garcia.
“It is not necessary to let the Garcias in. It is the failure of Tomas (Osmeña),” sigon pa niini sa interbyu sa DyRF.
Nasayran nga si 2nd district Congressman Pablo Garcia, 3rd district Congressman Pablo John Garcia ug ubang mga Sugbuanong kongresista nga kaalyado sa One Cebu Party ni Gov. Gwendolyn Garcia gikatahong mupaluyo sa kandidato sa pagka-house speaker nga gipaluyohan usab sa kampo ni Aquino nga si congressman-elect Feliciano Belmonte sa Quezon City.
Dugang pa ni Sonny Osmeña nga ang mga botos sa mga kongresistang kaalyado sa mga Garcia dili na kinahanglanon aron lang modaug si Belmonte sa pagka-house speaker. - BANAT NEWS