CEBU, Philippines - Usa ka drug suspect nga bilanggo sa Cebu Provincial Detention and Rehabilitation Center ang nakaeskapo niadtong Biyernes samtang padulong motambong sa hearing sa iyang kaso diha sa lungsod sa Borbon.
Ang nakaeskapo mao si Edison Cabahug, 39, residente sa barangay Tagnukan lungsod sa Borbon human kini kalit nga modagan pag-abot sa ilang lugar human tuguti sa jailguard nga si Joyte Noval nga makahapit sa ilang balay.
Sa pakighinabi sa Banat News ni PO2 Rey Suson sa Borbon Police Station padulong motambong sa hearing sa iyang kaso diha sa korte sa Borbon ang suspek uban ni Noval dihang mihangyo ang suspek nga mohapit sa ilang balay.
Apan pag-abot duol sa balay sa suspek kalit kining mikaratel og dagan palayo ug wala na makaapas pa si Noval, si Noval mitawag nalang sa kapolisan aron ipahibalo ang nahitabo.
Nasayran nga si Cabahug nag-atubang og duha ka kaso kini mao ang illegal possession of firearm ug kalapasan sa paghupot sa ginadiling drugas.
Padayon pa karong gipangita ang pugante. (BANATNEWS)