Gilugos, gimaso ang ulo patay

CEBU, Philippines - Usa ka 17-anyos nga katabang ang giingong gimaso sa ulo ug namatay human lugosa sa kaubang katabang lalaki diha sa panimalay sa ilang mga agalon niadtong milabay’ng Biyernes sa buntag.

Ang krimen nahitabo diha sa sulod sa kwarto sa biktimang si Rowena Rodrigo, lumad nga taga Matina, Tabogon nga upat palang ka adlaw nga nagpuyo sa Abayan Junk Shop sa barangay Basak, dakbayan sa Mandaue.

Apan gidemalas ang suspetsadong si Remelito Serognas, lumad nga taga Mangiyaw, lungsod sa Asturias ug katabang gihapon diha sa nahisgutang junk shop nga gipanag-iya sa magtiayong Alvin Martin Abayan ug Jocelyn Abayan.

Si PO2 Sanchez Regarido sa homicide sa Mandaue City Police Station sa pakighinabi niini sa Banat News nagkanayon base sa imbestigasyon ni Insp. Ramil Morpos, deputy director sa Mandaue City Police Office nga niadtong Huwebes, si Rodrigo mao pay nangabli sa agalong si Alvin nga miabot gikan sa eskwelahan alas-10 sa gabii.

Sa wala pa moabot si Alvin, gikatahong milakaw na si Serognas kay mikuyog sa iyang mga paryente nga nagpuyo sa barangay Labogon tungod kay mag-overnight sila sa usa ka beach.

Nahibulong nalang ang magtiayong Abayan nianang pagka-Biyernes sa buntag nga wala pa magdegamo og pamahaw si Rodrigo hinungdan nga ilaha kining gipukaw sa lawak niini apan wala motubag.

Tungod walay mitubag bisan giunsa nila pagtuktok ang pultahan sa kwarto hinungdan nga ilaha kining gipugos og abli ug nakugang nalang sila nga patay na ang katabang ug nagkadugo sa agtang, ilong, walang bahin sa kilid sa kilay ug mata.

Nasuta sa kapulisan nga napiyapi ang ulo niini gikan sa pagkaigo sa usa ka gahi nga butang ug nawalis na usab ang sapot niini lakip na ang panty nga wala na matarong og suot hinungdan sa pagdudang gilugos kini.

Sa pagsusi sa kapolisan sa junkshop napalgan kauban sa mga tools ang usa ka nagkadugong maso. Matud pa sa tag-iya nga ang maong tool box adto niya gitugyan   kaniadto kang Serognas tungod kay kini maoy mogamit niini pagpiyapi sa mga scrap materials nilang mapalit.

Nasuta usab nga wala na diha ang mga gamit sa suspek sa iyang lawak hinungdan sa paglusad sa hot pursuit operation ug didto nadakpan sa Asturias ang suspek.

Base sa pagsukit-sukit sa kapolisan, si Serognas gikatahong miangkong sekreto siyang mibalik sa junkshop ug mikatkat sa paril dayon misulod sa bintana sa lawak ni Rodrigo.

Gikatahong human niya lugosa ang biktima mibahad ang naulahi nga isumbong siya niini ngadto sa ilang agalon hinungdan nga iyaha kining gibukbok og maso nga nakaingon sa kamatayon sa dalagita.

Nasuta usab sa mga imbestigador nga wala moadto sa iyang mga paryente sa Labogon ang suspek ug wala usab silay gikasabutang mag-overnight sa beach. ( Uban sa report ni Brenda Batuto)   (BANATNEWS)