Bayongbayong miunay'g luba sa maguwang

CEBU, Philippines - Usa ka bayongbayong miunay og luba angol sa iyang maguwang didto sa ilang balay sa Purok Caimito, barangay Sangi, dakbayan sa Toledo sa miaging buntag.

Ang biktima nailhan nga si Giovanni Villanueva Valmores, 26, samtang ang miluba kaniya mao ang 17 anyos niyang manghod.

Sumala sa kapolisan sa dakbayan sa Toledo nga sa sayo pa naglalis ang biktima ug ang iyang manghod bahin sa mga trabahoon sa balay.

Apan ang manghod nga init kaayo og ulo, mikuha og kutsilyo ug gihansak dayon kini ngadto sa biktima hinungdan nga samdan ang ulo ug bukton sa naulahi.

Gihatod dayon ang biktima ngadto sa Vicente Sotto Memorial Medical Center sa dakbayan sa Sugbo samtang ang suspetsado nasikop usab dayon sa kapolisan sa dakbayan sa Toledo. (BANATNEWS)