Tulisan sa Talisay nadakpan sa kapolisan

CEBU, Philippines - Nagtingkagol sa Talisay City detention cell ang usa ka 18-anyos nga suspetsadong tulisan human kini masikop sa mga polis didto sa barangay Tabunok, dakbayan sa Talisay sa miaging gabii.

Siya mao si Reneboy Premor, nga taga barangay Tanke sa nahisgutang siyudad, samtang ang nabiktima sa tulis mao si Hara Melesa Bacus, 22, nga taga barangay Lagtang, Talisay.

Ang duha ka kauban ni Premor nga sila si Vonlester Umpad ug Mante Quebic pulos nakaikyas ug padayon pang gipangita sa mga polis.

Si Premor nasikop nila ni PO3 Alfredo Cuizon, PO1 Jundave David ug PO1 Gerard Larong kinsa nagpatrolya niadtong higayona didto sa maong lugar.

Nasakmit sa kapolisan gikan sa suspetsado mao ang usa ka kalibre .38 nga revolver nga may tulo ka buhing bala ug ang cell phone sa biktima uban ang P1,500 nga kwarta niini.

Si David mibutyag sa Banat News nga si Bacus nagbarog sa daplin sa karsada kay nag-atang og PUJ paingon sa Minglanilla, dihang kalit lang mitungha ang tulo ka suspetsado kinsa giingong pulos mga armado ug si Premor maoy mition dayon sa iyang armas de fuego kang Bacus ug gikuha ang iyang cellphone ug kwarta.

Maayo kay nakapangayo dayon og panabang si Bacus sa mga estambay sa maong lugar ug maoy nakataho ngadto sa kapolisan.

Gigukod dayon sa kapolisan ang tulo kinsa mikabad og panagan apan si Premor dali kaayong naapsan sa kapolisan samtang sila si Umpad ug Quebic nakasulod sa si-ot nga dalan hinungdan nga wala na kini hiapsi. Giandam na ang tukmang kaso batok sa dinakpan. (BANATNEWS)