CEBU, Philippines - Nakagawas na sa Sugbu ang gunman sa mibanhig patay sa magpapatigayong si Manuel Ting nga nahitabo niadtong Martes sa gabii diha sa dalan F. Llamas, corner San Jose sa barangay Tisa ning dakbayan.
Kini maoy gibutyag ni Sr. Supt. Melvin Buenafe tigpamaba sa Task Force Ting ug hepe sa Regional Intelligence Division (RID) sa press conference kagahapon.
Hinuon matud ni Buenafe nga nagpadayon ang ilang pagpangita sa gunman bisan paman kun nakagawas na kini sa Sugbu ug nakig-alayon na sila sa ubang police units sa laing rehiyon gawas sa Sugbu.
Gikunsiderar usab nilang dili lang usa ka suspek ang nakagawas na sa Sugbu nga gituohan nilang dili taga dinhi apan nagtuo silang aduna kini local contact.
Samtang gibutyag ni Buenafe nga duna na silay gipanid-ang negosyante nga nagbase dinhi sa Sugbu nga ilang gidudahang maoy nagsugo pagpapatay kang Ting apan dili niya ikabutyag hangtud nga wala silay makuhang ebidensya.
Pabilin ang pagtuo sa kapolisan nga may kalambigitan sa negosyo ug personal nga bangi nga may labot sa kwarta ang motibo sa krimen ug nagduda silang ang gunman ni Ting ug sa manghod niining si Nicolas Ting sa Cabancalan dakbayan sa Mandaue usa ra.
Sa gihapon nagdumili pagtug-an si Buenafe sa tanang detalye nga ilang nakuha kay makaapekto kini sa ilang hot pursuit operation.
“We have limit our information, I hope you understand (media) kasi hindi pa hawak natin ‘yung tao (gunman),” pasabot pa niini. – BANAT NEWS