CEBU, Philippines - Nakuyawan ang mga nangaligo sa Ouano Wharf human mipakita ang usa ka dakong isda sa ilang gikaligoan sa milabay’ng hapon, apan namatay ra kini pipila ka oras ang milabay.
Si Jovannie Famor sa Bureau of Fisheries and Aquatic Resources mihulagway sa maong isda nga usa ka “Sun Fish” nga makita lamang kini sa kinailawoman sa kadagatan.
Si Samuel Villegas nga usa sa mga nangaligo nakuyawan dihang kalit nga mitunga ang maong kapin sa tulo ka metros nga isda sa ilang taliwa hinungdan nga nanawag sila sa BFAR.
Base sa paghiling ni Famor sa maong isda, aduna kini samad sa ulo nga gituhuang agi sa usa ka propeller sa barko. Nagtuo si Famor nga bisan diha lamang magkanunayan sa lawom nga bahin sa dagat ang maong isda posibleng nadisturbo kini gumikan sa kainit sa panahon ug mipaibabaw ug naatlan sa pag-agi sa usa ka barko ug naigo.
Ang maong isda gidala sa usa ka laboratoryo sa University of San Carlos apan pipila ka oras sa pag-atiman niini ilabi na sa samad nga nahiaguman sa maong isda namatay gyud kini.
Ang sun fish mitimbang og sobra sa 100 kilos, ang ikog niini adunay 90 ka pulgada ang gilapdon ug mosukod sa kapin tulo ka metros ang gitas-on.
Mipahimangno si Famor sa publiko nga kung makakita sila og susamang matang sa isda itaho gyud dayon kini ngadto sa ilang buhatan ug dili pasipad-an o kan-on sa tawo.
Kini na maoy ikatulong higayon nga may susamang isda nga mitunga sa Visayas, sa milabay’ng tuig susamang isda ang nakita diha sa dakbayan sa Talisay ug laing usa sa dakbayan sa Lapulapu. - BANAT NEWS