Bayronon kuryente hayan motaas: Veco

CEBU, Philippines - Ang Visayan Electric Company kon VECO mipahibawong hayan mosaka usab ang bayrunon sa mga kunsumidor sa kuryente dinhi sa Metro Cebu Area sa mosunod nga mga bulan.

Kini kun ang Energy Regulatory Commission kon ERC moaproba sa petisyon sa National Power Corporation nga mapatas-an ang ilang power rates sa pagbaligya og supply sa kuryente ngadto sa mga power distributors sama sa VECO tungod sa kataas na sa galastohan sa maintenance sa ilang power generation.

Sumala pa sa tigpamaba sa VECO Ethel Natera nga ang ilang kompanya walay mahimo kun motugot ang ERC sa petisyon sa NPC ug ubang mga independent power generators gawas sa pagpasa sa dugang gastohan sa VECO sa pagpalit sa power supply ngadto sa mga konsumidor sanglit gitugot man usab kini sa balaod.

Dugang pa ni Natera nga ila lamang paabuton kun pila ang itugot sa ERC nga increased rate sa NPC aron masayran usab nila kun pila usab ang ilang idugang nga patong sa bayrunon sa mga konsumidor.

Nasayran nga niadtong bulan sa Enero ang National Power Corp. kon NPC miduso og petisyon sa ERC sa pagpasaka og cumulative coast recovery petitions aron makabawi sa mitaas nga presyo sa lana ug sa currency exchange rate.

Sa report sa Philippine Star niadtong milabay’ng Lunes, ang Napocor gustong mopasaka og power rate hike nga 62.51 centavos per kilowatt-hour (kwh) sa Luzon grid aron makarekober sa foreign exchange ug fuel costs ilawom sa 16th generation rate adjustment mechanism (GRAM).

Sumala pa nga sa aplikasyon sa Napocor, pinaagi sa adjustment nga ilang gipangayo ang (ICERA) mahimo nang 63.61 centavos per kwh sa Luzon, 7.04 centavos per kwh sa Visayas, ug 3.99 centavos per kwh sa Mindanao.

Buot usab nga mopatuman og 9.73 sentimos ilawom sa GRAM ug 1.1 sentimos sa Visayas ug Mindanao.

Ang tubag unya sa petisyon gipaabot nga mogawas sa mosunod nga bulan.  - BANAT NEWS