Sakop sa Bloods gipusil angol

CEBU, Philippines - Kritikal ang kahimtang sa usa ka 21 anyos nga sakop sa Bloods gang human kini pusila sa sakop sa karibal nilang Crips gang didto sa barangay Palanas, lungsod sa Alcantara kagahapon sa ala 1:15 sa kaadlawon.

Ang biktima mao si John Michael Caldino, 21, ulitawo, nga taga barangay Mabolo, siyudad sa Sugbo, kinsa nasayrang sakop sa Bloods gang ug igo lang namiyesta sa maong lugar.

Samtang ang suspek kinsa wala pa matumbok sa kapolisan ang ngalan, nasayran usab nga sakop sa Crips gang didto sa Alcantara.

Si PO1 Fortunato Mamac sa Alcantara Police Station mibutyag sa Banat News nga ang biktima kauban sa iyang igsoon nga si Erma Grace Caldino, hingkod, nga taga Mabolo, nagkuyog sa pagpamiyesta didto sa Palanas ug didto moestar sa balay sa ilang higala.

Misaksi sila sa kalingawan sa bisperas sa piyesta niadtong Miyerkules sa gabii ug nianang pagkakaadlawon na kagahapon sa ilang pagpamauli kalit lang gipusil makaduha ka higayon ang biktima.

Human masabak sa tiyan ang biktima mialibwag dayon og panagan ang grupo sa mga batan-on nga giingong sakop sa Crips gang sa Alcantara diin didto nanukad ang mipusil sa biktima.

Ang biktima daling gihatod ngadto sa Badian District Hospital apan gibalhin usab dayon kini ngadto sa tambalanan sa dakbayan sa Sugbo.  – BANAT NEWS