Namutol'g kahoy gipriso

CEBU, Philippines - Nagtingkagol sa Talisay City detention cell ang usa ka drayber sa PUJ nga gikargahan sa mga pinutol nga punoan sa kahoy human kini masikop sa mga opisyal sa barangay Manipis kauban sa mga tanod didto sa barangay Tabunok, dakbayan sa Talisay sa miaging kaadlawon.

Ang nasikop mao si Junifer Mateo, 23, taga barangay Basak San Nicholas, dakbayan sa Sugbo, ug drayber sa PUJ nga nagtangag sa plakang GVC-377.

Ang mga kauban ni Mateo nga sila si Fernando Silva alyas “Andot”, nga taga Manipis; Marcos Silva alyas “Macoy”, taga barangay Camp 6; Marciano Silva Jr. alyas “Jun-Jun”; taga Camp 6, ug Jonathan Cabigas alyas “Atan”.

 Ang PUJ nga gimaneho ni Mateo kargado sa 36 ka mga pinutol nga punoan sa kahoy nga may gitas-ong upat ka tiil matag usa, anaa karon sa kostudiya sa Talisay City Police Sation sa barangay Poblacion.

Base sa imbestigasyon sa mga polis, nasayran nga ang mga suspetsado giingong namutol og kahoy didto sa Barangay Manipis hinungdan nga si Kapitan Joselito Laurente uban ni Kagawad Edwin Ebin ug sa duha ka mga tanod nga sila si Esperideon Jabonita ug Mariano Ebin Jr. miadto sa maong lugar.

Apan ang mga suspetsado daling misibat sakay og PUJ ug mipahilayo sa lugar kay nakabantay sila sa mga opisyal sa barangay ug mga tanod nga nagpaingon sa ilang nahimutangan.

Busa gigukod sila sa mga opisyal sa barangay ug mga tanod ug didto sila hisakpi sa Tabunok. Dihadiha milayat gikan sa sakyanan ang upat ka mga suspetsado ug misibat dayon ug gibiyaan ang drayber.

Si Mateo maoy gipriso karon   sa kapolisan samtang ang sakyanan nga gikargahan sa mga kahoy anaa ang tanan sa kustodiya sa kapolisan. – BANAT NEWS