CEBU, Philippines - Away sa pamilya ang gisubay karon sa mga imbestigador sa kapolisan nga motibo sa pagpamanhig sa magsuong Nicolas ug Manuel Ting sa managlahing petsa ug lugar.
Si Nicolas Ting, 70, padayong giatiman sa mga mananambal sa usa ka pribadong tambalanan human gibanhigan sa barangay Cabancalan, Mandaue niadtong Lunes sa gabii, samtang ang iyang manghod nga si Manuel Ting gibanhigan usab niadtong Martes sa gabii sa barangay Tisa, siyudad sa Sugbo ug namatay gyud tungod sa 11 ka samad pinusilan nga miigo sa ulo ug lawas.
Sumala pa sa polis (mihangyong dili magpaila) nga nag-imbestigar sa nahitabong pagpamanhig sa barangay Cabancalan nga adunay kalambigitan ang negosyo sa pamilyang Ting ang managlahing insidente.
Gitataw sa maong polis nga nagkasinumbagay si Nicolas ug Manuel tungod sa ilang panagsungi sa ilang negosyo.
“Dugay na kaayo to (ang panagsukmagay), pero wa mi kahibawo kun nag-uli na ba sa maayong kabubut-on ang duha,” matud sa tinubdan sa dihang nahinabi sa Banat News pinaagi sa telepono.
Gitataw usab sa maong polis nga ang magsuon adunay iya-iya nga koneksiyon sa nagkadaiyang grupo. Apan gitataw hinuon niya nga dili ilegal ang maong mga grupo tungod kay mga negosyong rehistrado sa gobyerno ang gikalambigitan sa magsuon ug mga pamilya niini. Sumala usab niini nga gawas sa ilang kasuod sa kapolisan, National Bureau of Investigation ug militar, ang pamilya ni Manuel ug Nicolas pulos mahiligon sa armas isip kalingawan niini.
Si Manuel nanag-iya og dakong hotel, samtang si Nicolas nanag-iya usab og pension house sa uptown area ug giingong supplier og mga gold sa mga pawnshops sa Sugbo.
Si Sr. Supt. Noel Gillamac, direktor sa Mandaue City Police Office, mikonpirmar nga hingpit na nilang gisalikway ang anggulo sa “love triangle” ug gisentro sa imbestigasyon ang negosyo ni Nicolas.
Gitutokan hinuon, sumala pa ni Gillamac, ang pag-ila sa duha ka tawo nga maoy nagbanhig kang Nicolas.Sa imbestigasyon ni Insp. Ramil Morfus, deputy chief sa Investigation and Detection Management Bureau sa MCPO, nasayran nga si Nicolas naghatod sa usa ka babayeng nailhang si Melecia “Miles” Baraquis Carcellier sa barangay Cabancalan.
Subay niini, gi-umol sa kapolisan sa rehiyon ang Task Force Ting aron maoy modumala sa pag-imbestigar sa duha ka hitabong pagpamanhig nga naglambigit sa magsuong Ting.
Atol sa Talakayan sa Isyung Polis (TSIP) sa Police Regional Office-7, si PRO-7 director Lani-O Nerez nagkanayon nga maglangkob sa task force ang Criminal Investigation and Detection Group-7, MCPO, Cebu City Police Office, Crime Laboratory, ug Regional Intelligence Division (RID-7). Si Sr. Supt. Melvin Buenafe ang gitudlong hepe sa Task Force Ting, ug mao usab kini ang tigpamaba niini.
Sama sa mga sakop sa Homicide Section, si Nerez nagdumili sa pagtug-an sa anggulo sa pagpamanhig kang Manuel ug Nicolas.
Bisan wala pa maklaro sa Task Force Ting ang motibo, si Nerez mihulagway sa duha ka hitabo nga “isolated case” ug dili makaapekto sa turismo sa Sugbo.
Si Nicolas na-operahan na ug nakuha na sa mga doktor sa Chong Hua Hospital ang miungot nga bala sa iyang lawas.
Samtang si Manuel gihaya sa St. Peter Funeral sa barangay Lorega-San Miguel human mamatay sa upat ka mga bala nga miigo sa ulo, pito sa dughan ug mga bukton.
Si Zenelyn Manguilimutan, general manager sa hotel nga gipanag-iya ni Manuel, miasoy sa mga tigbalita nga si Bise Mayor nga karon Mayor-elect Michael Rama mipasalig nga buhaton niini ang tanan aron mahatag ang hustisya sa kamatayon ni Manuel.
Samtang si Jojo Dizon, anak ni Nicolas, mipasalig ngadto ni Gillamac nga mokooperar sa ipahigayong imbestigasyon kun makagawas na sa ospital ang ilang amahan.
Samtang gikondenar sa presidente sa Cebu Filipino Business Club, Rey Calooy, ang nahitabo sa magsuong Ting.
Ang opisyal usab sa Cebu Chamber of Commerce and Industry nga si Jay Aldeguer nagkanayon nga maka-apekto sa turismo ang duha ka insidente. Naatol ang pagpamanhig sa pagbukas sa Tourism Congress sa Sugbo ning semana. – BANAT NEWS