Isnatser gipaulanan og mga bala, patay

CEBU, Philippines - Naglunang sa kaugalingong dugo ang usa ka gipasanginlang isnatser kini human gipa-ulanan og bala sa duha ka wala mailhing mamumuno pasado alas-8 sa miaging gabii atubangan sa A.S. Baclig Ave. sa barangay Tejero ning dakbayan.

Ang biktima nailhan nga si Handly “Honasan” Castillo, 21, ug molupyo sa sitio Silangan Dos, sa maong barangay kinsa gibulit og bala sa kalibre .45 ang lawas nga nakaingon sa hinanali niining kamatayon.

Base sa imbestigasyon sa Homicide Section sa Cebu City Police Office ang gwardiyang si Junard Sumampong, 27, nga nadestino sa establisamento duol sa gilingkoran sa biktima nakadungog nalang og butobuto.

Sumala pa niini ngadto sa kapolisan nga uwahi niyang nakit-an ang biktima nga naglingkod diha daplin sa dalan nga susama og dunay gipaabot ug sa dihang misulod na siya sa establisamento diha na mahitabo ang pagpamusil.

Gumikan niini mibalik siya sa agi ug gisusi asa kini maggikan apan mao nalay iyang nakit-ang nagbuy-od na si Castillo nga wala nay kinabuhi hinungdan nga mitawag siya sa kapolisan.

Ang mga imbestigador nakakuha og walo ka basiyo sa kalibre 45 nga bala ug duha ka deformed slug ug metal fragments.

Matud pa ni PO2 Jodan Batucan nga si Castillo maoy gitumbok nga manglabnihay sa maong dapit ug sakop kini sa grupong nalambigit sa maong modus operandi.

Dugang pa niya base sa ilang nakuhang mga impormasyon magsulod-gawas na kini sa bilanggoan gumikan sa maong mga kaso.

Apan gisalikway sa kapolisan ang pagdudang vigilante ang mipatay sa biktima ug nagtuong mga kaubanan ni Castillo sa ilang grupo ang miunay og patay niini gumikan sa dili maayong bahinay sa kinawat.  – BANAT NEWS