Negosyante gi-ambush

CEBU, Philippines - Ugangan sa konsehal sa dakbayan sa Mandaue gibanhigan sa mga armadong lalaking luwan sa motorsiklo niadtong milabay’ng gabii diha sa eskina sa dalan ML Quezon ug Hernan Cortes Avenue. Apan luwas sa makuyaw’ng kahimtang ang biktimang usa ka negosyante.

Ang gibanhigan giilang si Nicolas Teng, 70, residente sa barangay Cabancalan sa dakbayan sa Mandaue kinsa amahan sa bana ni Konsehal Emarie “Lolipop” Dizon nga si Jojo Dizon.

Sa pasiunang imbestigasyon ni Insp. Ramil Morfus ang Deputy Chief sa IDMB sa MCPO gihatud ni Teng si Melecia Baraquis Carcellier alyas “Miles”, 25, sa maong dapit.

Apan kalit lang mibutho ang usa ka motorsiklong may duha ka lalaking sakay ug angkas niini kalit mitupad sa driver’s seat dayong rakrak ginamit ang kalibre 45 nga pistola.

Si Teng nagmaneho sa iyang Honda CRV   nga adunay plaka HUS-888.

Si Teng naigo sa aping ug duha ka samad pinusilan sa dughan ug daling gidala ni Carcellier sa North General Hospital apan gibalhin kini sa usa ka pribadong tambalanan sa dakbayan sa Sugbu.

Padayon pang giobserbahan sa mga mananambal si Teng gumikan sa mga samad nga iyang nahiaguman, apan gipadayag sa doktor niini nga dili “fatal” ang mga igo sa biktima sa iyang dughan.

Unom ka mga agi sa bala ang nakita diha sa sakyanan ni Teng samtang tulo ka mga basiyo sa balang kalibre .45 ang nakuha. Samtang na-recover usab sa kapolisan ang duha ka botelya sa beer nga giinom sa mga gikatahapan samtang nagpaabot sa biktima diha sa maong dapit.

Matud pa ni Mandaue City Police Office OIC director Sr. Supt. Noel Gillamac, tulo ka anggulo ang gisubay karon sa mga sakop sa IDMB diin usa niini may kalambigitan sa negosyo diin ang pag-umangkon sa biktima adunay gipadumalang negosyo ngadto ni Teng. Ikaduha mao ang personal nga kasuko human masayri sa kapolisan nga adunay nakalalis si Teng nga usa ka Koreano sa casino sa Lahug ug ang giingong bangi sa panagbahin sa katigayonan.

Nasuta sa kapolisan nga nag-inusara nalang si Teng sa iyang panimalay sa Cabancalan ug wala kini mokuha og kaugalingong drayber nga maoy magdala kaniya sa iyang mga lakaw bisan pa sa iyang pangidaron nga 70 anyos.

Atol sa imbestigasyon sa IDMB sa MCPO nasutang sa wala pa mahitabo ang pagpamanhig nag-inom pa og beer ang mga gikatahapan pipila ka metros sa gipuy-an ni Teng ug sa boarding house ni Carcellier.

Matud pa ni Insp. Morfus posibleng dunay laing lookout sa panimalay ni Carcellier nga maoy nagpahibalo sa pag-abot sa sakyanan ni Teng ug daling mibiya sa tindahan ug wala na gani kuhaa ang sukli ug midiretso og sakay sa motorsiklo ug gipusil si Teng.

Samtang si Ouano-Dizon mihangyo kang Gillamac nga pabantayan og pulis ang tambalanan nga nahimutangan sa iyang ugangan ug ang daling kasulbaran sa maong kaso. – BANAT NEWS