CEBU, Philippines - Gipahibalo sa tigpamaba sa One Cebu Party nga si Capitol Consultant on Information Rory Jon Sepulveda nga ang tanang mga elected officials sa One Cebu Party manumpa sa ilang bag-ong katungdanan atubangan ni Presidente Gloria Macapagal Arroyo karong June 28 adlaw nga Lunes sa Cebu International Convention Center kon CICC sa dakbayan sa Mandaue.
Matud pa ni Sepulveda nga si Gob. Gwendolyn Garcia maoy manguna sa pagpahigayon sa iyang oath taking ngadto kang Arroyo uban ang mga kongresista, mga provincial board members, mga mayor sa component cities ug mga kalungsuran uban ang mga bise mayor ug mga konsehal.
Si Sepulveda nagkanayon nga si Arroyo maoy magsilbing 'honored guest' sa ilang gipadalang imbitasyon diha sa Presidential Management Staff ug gi-aprobahan na “by principle.” Kauban sa giimbitar ang napilding standard-bearer sa Lakas Kampi nga si kanhi defense secretary Gilbert Teodoro ug uban pa.
Sumala pang Sepulveda, isip maoy ‘highest official of the land’ si Arroyo maoy buot nilang mopanumpa sa partido agi og pagpakita og dakong pasalamat kay nakautang og maayong kabubut-on ang Cebu tungod sa mga nahatag niining dagkong proyekto sama sa South Coastal Road ug South Road Properties apil na ang labing unang subway tunnel sa siyudad sa Sugbu ug uban pa.
Sa pamahayag ni Sepulveda, ang gipanghinganlan niining mga tulo ka dagkong proyekto pulos naa sa dakbayan sa Sugbu nga gihulagway ni Sepulveda nga mas dagko pa kumparar sa nahatag sa tulo ka mga nangaging mga presidente sa nasud.
Si Sepulveda nagkanayon nga angayang pasalamatan si Arroyo sa mga nahimo niini sa Sugbu ug dili kay talikdan na lamang tungod lamang kay natapos na ang iyang termino.
“We are confident that this will not be misinterpreted by the incoming president, sanglit ang proyekto ni Arroyo nahuman ug nakita man samtang kang presidente-elect Sen. Benigno ‘Noynoy’ Aquino tan-awonon pa,” matud pang Sepulveda. (BANAT NEWS)