Mga lawak tak-opan

CEBU, Philippines - Napulo ug duha ka mga lawak-saringan sa Mandaue City Central School ang temporaryong tak-upan ug dili magamit sa gibana-banang kapin 500 ka mga tinun-an samtang wala pa kini ma-repair.

Si Benjamin Tiongson nga maoy administrative officer sa division office sa Department of Education (DepEd) sa maong dakbayan nga nahinabi sa Banat News nagkanayon nga kini maoy base sa rekomendasyon sa city engineers office.

Ang city engineers sa dakbayan mi -imbentaryo sa gihimo sa mga edipisyo sa mga pampublikong tunghaan sa dakbayan ug nakitang ang 12 ka lawak saringan sa karaang building sa MCCS dili na luwas gamiton.

Si Tiongson miingon nga ang tsirman sa school board nga si Mayor Jonas Cortes miluwat og kamandoan sa city engineering office alang sa maong imbentaryo ug paghimo og plano alang sa dinaliang pagpa-renovate niini.

Tungod niini, nadungagan ang problema sa kakulang sa mga lawak-saringan alang sa mga tinun-ang naapektahan ug karon adto una sila magklase sa ubang lawak.

Matud pa ang maong buhatan, dunay dakong pagsaka sa gidaghanon sa mga estudyante sa dakbayan sa Mandaue ug sa kinatibuk-an may average kining 80 ngadto sa 90 ka mga bata sa matag lawak.

Kun ang basehan sa matag lawak-saringan 50 ka tinun-an adunay 600 ka mga estudyante sa maong tunghaan ang naapektahan karon.

Si DepEd regional director Recaredo Borgonia sa milabay’ng semana mibutyag nga misaka og dos porsiyento ang gidaghanon sa mga nagtungha karong tuiga sa pampublikong tunghaan sa rehiyon.

Dakong porsiyento niini diha sa Mandaue ug Lapulapu ingon man sa Negros hinungdan nga dunay pipila kanila ang kinahanglang mag-double shifts aron mabahin ang klase ug matudloan og maayo sa leksyon ang mga bata. (BANAT NEWS)