Taxi gidagit sa tulisan

CEBU, Philippines - Nawad-an sa iyang kinitaan sa pagpamasahero , lakip na ang taxi nga iyang gimaneho, ang usa ka drayber sa taxi human kini tulisa sa duha ka armadong mga lalaki nga nagpakaaron-ingnong pasahero paingon ngadto sa dakbayan sa Mandaue gikan sa Pusok, dakbayan sa Lapulapu sa miaging gabii.

Ang biktima mao si Antonio Cantones, 38, minyo, lumad nga taga lungsod sa Dumanjug ug drayber sa Soft Ride Taxi nga nagdala sa plate number GXK 203.

Si Inspector Wilson Abot, deputy chief sa presinto 5 sa Opao Police Station nga nahinabi sa Banat News miingon nga ang drayber gitionan og armas de fuego nga wala matino ang kalibre sa maong mga lalaki sa pag-abot niini sa U.N. Avenue sa barangay Umapad sa dakbayan sa Mandaue ug gikuha ang iyang pitaka nga maoy gisudlan sa iyang kinitaan sa pagpamasahero nagkantidad P2,900.

Si Inspector Abot midugang nga human makuha ang pitaka, gipakanaog sa mga tulisan ang biktima gikan sa taxi ug sila nay midala sa maong sakyanan.

Matud pa ni Inspector Abot nga human ikataho sa biktima kanila ang maong hitabo nakadawat dayon sila og tawag sa telepono gikan sa usa ka Roly Ricaplaza nga kawani sa Soft Ride taxi ug nagpahibalo nga ang taxi nga gidagit didto mapalgi sa barangay Tayud sa lungsod sa Consolacion.

Dugang pa ni Inspector Abot nga sa kasamtangan nagpadayon pa ang ilang follow up operation aron sa pag-ila sa maong mga tulisan. (BANAT NEWS)