CEBU, Philippines - Higpit nga gidili alang sa mga nagtungha nga kabataan sa elementarya ug sekondarya sa pribado ug publikong tulunghaan sa dakbayan sa Mandaue ang pagsulod sa mga computer shops, sinehan, pagsuroysuroy sa mga mall ug uban pa sa oras sa tingklase.
Si Benjamin Tiongson nga maoy administrative officer sa division office sa Department of Education (DepEd) sa maong dakbayan nga nahinabi sa Banat News mipadayag nga adunay DepEd Order 86 Series of 2010 nga giluwatan si education secretary Mona Valisno kabahin niini.
“Prohibiting students in public and private elementary and secondary schools from going to computer shops, malls, theaters, and the likes during their class hours,” matud pa sa kamandoan ni Valisno.
Ang DepEd naalarma niining gikabuangan karon sa mga tinun-an nga magpunay og cutting classes ug adto magtipun-og sa mga internet cafés, sinehan ug mga malls.
Gimandoan ang mga kadagkoan sa mga tunghaan nga monitoron ang mga tinun-ang magpunay og absent ug kadtong magpunay og cutting classes tungod lang kay nagpunay nalang sa internet cafés aron mahimoan og aksyon.
“School discipline to be imposed should primarily focus on guidance counseling of the students involved, and dialogue with his\her parents or guardians,” dugang pa sa maong kamandoan ni Valisno.
Hinuon aron usab alkontrahan ang bag-o karong gikabuangan sa internet cafés sama sa mga offline ug online games nga wala sa mga tunghaan giawhag ni Valisno ang mga tunghaan sa paghimo og mga programa sama sa creative arts, dramatic arts ug uban pa aron adto mapunta ang atensyon sa mga estudyante.
Samtang giawhag ni Valisno ang kadagkoan sa mga tunghaan sa pagpangayo og tabang sa mga lokal nga kagamhanan aron mohimo og mga ordinansa nga makatabang sa maong problema. (BANAT NEWS)