CEBU, Philippines - Naangol ug nalandig sa tambalanan ang usa ka polis human madasmagi og pasaheroang multicab ang iyang gimanehong motorsiklo sa miaging hapon sa national highway sa barangay North Poblacion sa lungsod sa San Fernando.
Ang polis nga naangol giilang si PO1 Hardy Cusedo nga nadestino sa Mandaue City Police Office (MCPO) samtang ang nakadasmag kaniya nga multicab gimaneho ni Nelson Umbao.
Si PO1 Lauro Laurel, duty investigator sa San Fernando Police Station nga nahinabi sa Banat News mitug-an nga paingon sa siyudad sa Carcar si Cusedo apan pag-abot niini sa intersection kalit lang siyang mi-left turn.
Apan ang multicab nga paingon usab sa siyudad sa Carcar wala makabantay sa pagliko ni Cusedo hinungdan nga naabtan gyud ang luyong bahin sa motorsiklo sa biktima.
Tungod niini natumba ang motorsiklo ug nalagpot ang maong polis nga miresulta sa pagkaangol niini.
Si Cusedo daling gidala sa South General Hospital sa siyudad sa Naga apan matud ni Laurel gibalhin na karun sa Chung Hua Hospital dinhi sa dakbayan sa Sugbu samtang mitahan si Umbao sa iyang kaugalingon sa kapolisan. (BANAT NEWS)