CEBU, Philippines - Usa ka wala mailhing lalaki ang gipusil patay sa usa ka wala mailhing lalaking nagsakay og bisekleta diha sa eskina sa Magallanes ug F. Gonzales sa barangay Sto. Niño ning dakbayan gahapon sa kaadlawon.
Ang biktima padayon pang giila sa kapolisan ug gibana-banang 45, anyos ang pangidaron.
Sumala pa sa gwardiya nga si Sergio Longgaquit Dacles Jr. ug kargador nga si Vicente Edaño, 42, nakadungog sila og butobuto sa armas sa maong dapit ug dali nila kining gisusi.
Diha nila makit-i ang wala mailhing lalaking nagsakay og bisekleta nga mipasutoy palayo sa naghagbang patay’ng lawas sa maong lalaki hinungdan nga ilaha kining gipahibalo sa mga barangay tanod.
Base sa imbestigasyon sa Cebu City Police Office Homicide Section nakaangkon og usa ka samad pinusilan sa walang bahin sa ulo ang biktima nga maoy gituhuang hinungdan sa hinanali niining kamatayon.
Ang patay’ng lawas sa biktima gidala sa Saint Francis Funeral Homes alang sa autopsy. – BANAT NEWS