Biyahe sa mga abyon nabalik na sa normal

CEBU, Philippines - Nabalik na sa normal ang mga flights sa mga abyon kagahapon sa buntag padulong ngadto sa kaulohan human kini temporaryong gikanselar sa milabay’ng adlaw gumikan sa pagkaguba sa ilang VHF Omni-Directional Ranger (VOR) sa Ninoy Aquino International Airport kon NAIA.

Si MCIA Gen. Manager (Ret.) Gen. Danilo Francia mitug-an sa mga sakop sa media nga sugod kagahapon mga alas11:00 sa buntag normal na ang mga flights ngadto sa kaulohan.

Mga alas 9:00 kagahapon sa buntag nasayran sa operation section sa MCIA nga nasulbad ra ang problema sa VOR sa control tower sa NAIA ug mipahibalo dayon kanilang nabalik na ang normal nga schedule sa mga flights.

Pipila sa mga natanggong nga pasahero sulod sa pipila ka oras nagbagutbot gumikan kay igo lamang sila ipangsal-ot sa mga gikatakdang abyon nga molupad ngadto sa kaulohan.

Matud pa ni Gen. Francia nga gumikan sa nagubang ekipo mi-divert ang ubang abyon sa alternate airports sa Luzon.

Ang maong ekipo dako og papel sa kaluwasan sa mga abyon ug pasahero panahon sa kagabhion ug dautan ang panahon gumikan kay kini maoy mogiya sa mga abyon diha sa air traffic aron dili magkabinanggaay.  – BANAT NEWS