SEF sa Kapitolyo gipamalit notebook, wa ipamolitika

CEBU, Philippines - Kusganong gipanghi-makak sa tigpamaba sa Kapitolyo nga si Rory Jon Sepulveda ang mga pagduda ug pagsaway sa mga academe dinhi sa Sugbu ug sa Manila nga ang pundo sa Special Education Fund(SEF) sa probinsiya gigamit sa pamolitika sa gobiyerno.

Ang academe sector misaway sa mga politiko lakip na dinhi sa Sugbu gumikan sa mga gipang-apod nga mga school supplies nga adunay mga hulagway sa mga politiko sama nila ni Gob. Gwendolyn Garciaug Bise Gob. Gregorio Sanchez ug mga sakop sa Hunta Probinsiyal.

 Giangkon ni Sepulveda nga may mga hulagway ni Garcia apan ang katuyuan niini dili aron mosikat ug mosamot ka inila ang gobernador kundili aron lamang mailhan kun si kinsa ang namunoang opisyales sa lalawigan.

Gipasabot usab niyang ang front cover sa mga notebooks karong tuigang ilang ipanghatag nga SEF may mga hulagway sa mga nindot nga mga lugar ug tourist spots sa lalawigan sa Sugbu.

Matud pa ni Sepulveda nga ang gobernadora maoy nag-unang opisyal sa gobiyerno nga nangusog sa pag-promote sa tourist destinations sa lalawigan maong angayan lamang nga iapil ang hulagway niini sa front cover.

Si Sepulveda miingon nga ang gobernadora ug ang mga opisyales sa lalawigan sa Sugbu nagtuong ang mga pagpanghatag og libreng mga notebooks nga may mga hulagway sa mga dapit sa lalawigan makatabang sa tinguha sa kagamhanan nga ma-promote ang mga tourist spots dinhi sa Sugbu. – BANAT NEWS