Motorsiklo misungag sa traysikol usa patay

CEBU, Philippines - Patay ang usa ka lalaki samtang usa ang naangol sa nahitabong panagbangga sa motorsiklo ug traysikol diha sa dalan P.J. Almendras sa barangay Suba siyudad sa Danao niadtong Biyernes sa alas 9:00 sa gabii.

Ang patay nang nadangat sa tambalanan mao ang drayber sa motorsiklong si Gerald Biarcal, 18, molupyo sa Lapulapu St., barangay Suba samtang grabeng naangol ang angkas niining si Mateo Almacen, molupyo gihapon sa maong lugar. Ang drayber sa traysikol nga si Christian Morales, nagpuyo gihapon sa maong lugar wala hinuon maunsa kinsa mitahan dayon sa kapolisan.

Matud pa ni PO1 Rommel Costan ang traffic investigator sa Danao City Police dihang nahinabi sa Banat News mitug-an nga ang motorsiklo paingon sa amihanan samtang ang traysikol gikan sa kasugat nga direksyon paingon sa siyudad sa Sugbo.

Pag-abot sa maong lugar gikatahong mi-overtake ang traysikol sa naghunong nga jeepney apan naatol nga mao say pag-agi niadtong tungura sa motorsiklo hinungdan nga nagkadinasmagay.

Gumikan sa kakusog sa panagbangga nangalagpot sila si Biarcal ug Almacen ug daling gihatud sa Danao District Hospital apan gideklarar sa mga doktor nga dead on arrival si Biarcal samtang grabe ang angkas niini. (BANATNEWS)