Curfew gipatuman sa Talisay

CEBU, Philippines - Ang kagamhanan sa dakbayan sa Talisay subling mipatuman sa curfew sa mga batan-on sugod niadtong Biyernes.

Si Superintendent Henry Biñas, hepe sa Talisay City Police Station mibutyag sa mga tigbalita nga ang peace and order council maoy nangusog niini.

Gidayeg ni Biñas kining pagpatuman pag-usab sa curfew, sanglit gawas nga makalikay sa unsa mang krimen, ang mga batan-on makaatiman pa sa ilang mga tun-anan ilabi na kun sila nag-eskuyla kay dili naman sila makalakwatsa panahon sa kagabhion.

Kahinumdoman nga ang mga tanod magpanagana sa pagsignit sa mga batan-on nga maglibudsuroy panahon sa lawom nang gabii, apan matud sa hepe sa kapolisan nga dili lang gyud pasakitan ang mga madakpan.

Gipahimangnoan usab ang mga tanod sa pagtuman lang sa balaod bahin sa tukmang paagi sa pagsikop aron dili malapas ang Juvenile Law nga nagprotiher sa mga bata.

Ang mga masikop nga mga batan-on adto dad-a sa sports complex sa barangay Poblacion unya ipaatiman sila sa mga tinugyanan sa city social welfare aron malukat sila sa ilang mga ginikanan.

Kahinumdoman nga niadtong wala pay ordinansa sa curfew sa mga batan-on, ubay-ubay ang mga menor de edad sa Talisay ang nalambigit sa kagubot ilabi na mga sakop sa gang. (BANATNEWS)