Naglakaw sa dalan gipusil angol

CEBU, Philippines - Naangol ang usa ka lalaki human kini pusila sa wala hiilhing kriminal didto sa Sitio Plastikan, Barangay Duljo–Fatima, ning dakbayan sa Sugbo, sa miaging kaadlawon.

Giila sa kapolisan ang biktima nga si Kenneth Cedino, 24, nga taga Plastikan, ulitawo ug walay trabaho.

Matud pa ni PO2 Leroy Baguio sa Cebu City Police Station Office nga sa sayo pa, ang biktima miadto sa balay sa iyang ka -live -in partner nga si Jocelyn “Eyen” Oralde aron estoryahan ang ilang problema.

Apan ang uyoan ni Oralde nga si Wilfredo Peligrino alyas “Pedot” misugo kaniya sa pagpapauli na sa ilang balay.

Samtang nagpaingon na sa ilang balay ang biktima, kalit lang milanog ang mga buto sa armas de fuego ug mao nalay nakita sa mga nakasaksi nga natumba ang biktima sa karsada.

Si Cedino kinsa samdan sa walang bahin sa lawas ug sa tuong bahin sa paa gihatod dayon ngadto sa Cebu City Medical Center.

Gipangita pa sa kapolisan ang kriminal.  (BANATNEWS)